Humbja e jetës së foshnjës 2-muajshe, Denis, ka marrë një tjetër rrjedhë pas dëshmisë së nënës së tij, Vjollca Shkëmbi. Mes dhimbjes dhe varfërisë ekstreme, ajo ka hedhur poshtë me forcë pretendimet e ngritura në opinionin publik dhe nga policia se fëmija i saj ndërroi jetë si pasojë e kequshqyerjes, duke drejtuar gishtin drejt sistemit shëndetësor.

Në një rrëfim ekskluziv për emisionin “Në kohë reale” në RTSH, e ëma e foshnjës shpjegoi kalvarin e vuajtjeve që nga lindja e parakohshme e të birit, neglizhencën e pretenduar mjekësore dhe pamundësinë financiare për t’i dhënë atij lamtumirën e fundit.

Sipas Shkëmbit, problemet e foshnjës nisën që në momentin e lindjes, e cila u krye me operacion dhe para kohe. Ajo pretendon se foshnja doli nga spitali pa u shëruar plotësisht.

“Për ndërrimin e jetës fajin e kanë doktorët. Ai lindi para kohe dhe me infeksion të rëndë në mushkëri, ndaj e dërguan menjëherë në Tiranë. Pasi qëndroi një muaj atje, e sollën në Korçë,” u shpreh ajo.

Nëna thekson se transferimi drejt Korçës u bë me justifikimin për t’i kursyer asaj shpenzimet e udhëtimit. Sipas saj, djali iu dorëzua në një gjendje jo të mirë shëndetësore.

Mohimi i kequshqyerjes dhe kushtet e mbijetesës

Shkëmbi jeton në kushte të vështira ekonomike, duke u mbajtur vetëm me një pagesë KEMP-i për shkak të problemeve të saj shëndetësore, ndërsa dy fëmijët e tjerë rriten nga gjyshja në fshatin Pojan. Megjithatë, ajo mohon kategorikisht zërat për neglizhencë në ushqim.

“Unë e ushqeja fëmijën me qumësht pluhur. Foshnja qëndroi me mua dy javë dhe jam kujdesur shumë për të. Nuk është e vërtetë çfarë thotë policia dhe njerëzit për kequshqyerje,” deklaroi ajo, duke theksuar se gjatë asaj kohe asnjë mjek nuk shkoi t’i vizitonte në banesë.

Kur gjendja e foshnjës u rëndua, ajo tregon se u detyrua të merrte para borxh për ta transportuar vetë drejt urgjencës së Bilishtit dhe më pas në Korçë, pasi nuk i ofruan ambulancë. Pasi mjekët në Korçë i hoqën shpresat për jetën e të birit, ajo refuzoi ta niste sërish drejt Tiranës.

Apeli tronditës: “Dua ta qaj në fshatin tim”

Pjesa më e dhimbshme e dëshmisë së nënës është pamundësia për të tërhequr trupin e fëmijës së saj të pajetë, i cili aktualisht ndodhet në morgun e Tiranës. E gjendur pa asnjë qindarkë, ajo i bën një thirrje të dëshpëruar shtetit:

“Fëmija është në Tiranë. Si nënë, dua të ma sjellin që ta qaj në fshatin tim. Nuk kam mundësi të shkoj ta marr, nuk kam asnjë qindarkë. I bëj thirrje shtetit të më sjellë foshnjën, që ta varros me duart e mia dhe të gjendet e drejta se përse fëmija im nuk jetoi.”

/rtsh.al/