Presidenti francez Emmanuel Macron zhvilloi një bisedë telefonike me Princin e Kurorës së Arabisë Saudite, Mohammed bin Salman, ku u diskutuan zhvillimet e fundit rajonale dhe pasojat e tyre.

Macron shprehu solidaritetin e Francës me Arabinë Saudite, duke dënuar sulmet e përsëritura iraniane ndaj Mbretërisë dhe duke riafirmuar mbështetjen e Parisit për masat e ndërmarra nga Riadi për mbrojtjen e sovranitetit dhe sigurisë së tij.

Gjatë bisedës, Macron shprehu solidaritetin e Francës me Arabinë Saudite, duke dënuar ashpër sulmet e përsëritura iraniane ndaj Mbretërisë. Ai riafirmoi mbështetjen e Parisit për të gjitha masat e ndërmarra nga Riadi për të mbrojtur sovranitetin, sigurinë dhe integritetin territorial.

Telefonata vjen në një kohë kur tensionet rajonale po rriten ndjeshëm. Një ditë më parë, Macron u bëri thirrje palëve të përfshira në konflikt që të vendosin një moratorium mbi goditjet ndaj objekteve energjetike dhe infrastrukturës civile.

Ai gjithashtu i kërkoi Iranit të lejojë lëvizjen e lirë të trafikut në Ngushticën e Hormuzit, duke paralajmëruar për “rrezikun e një përshkallëzimi të pakontrollueshëm”.

Franca ka intensifikuar kritikat ndaj Iranit ditët e fundit. Ministri i Jashtëm francez, Jean-Noel Barrot, gjatë një vizite në Izrael, deklaroi se çdo zgjidhje e qëndrueshme për konfliktin në Lindjen e Mesme duhet të mbështetet në një marrëveshje politike, e cila kërkon që Teherani të ndryshojë kursin.

“Çfarëdo rezultati të operacioneve ushtarake, ai duhet të shoqërohet me një zgjidhje politike që sjell rezultate të qëndrueshme,” tha Barrot në Tel Aviv, duke shtuar se “regjimi iranian duhet të jetë i gatshëm për të bërë lëshime të mëdha – një ndryshim radikal qëndrimi.”

/rtsh.al/