Gjykata Administrative e Apelit ka lënë në fuqi vendimmarrjen e institucioneve të reja të drejtësisë, duke rrëzuar këtë të martë padinë e ngritur nga shtetasi Gentian Ndoi kundër Këshillit të Lartë të Prokurorisë (KLP) dhe strukturave drejtuese të Byrosë Kombëtare të Hetimit (BKH).

Objekti i kësaj padie, i regjistruar pranë kësaj gjykate në vitin 2025, ishte kërkesa për shfuqizimin e vendimit nr. 370. Në këtë proces gjyqësor, pala paditëse kishte thirrur si të paditur KLP-në, Komisionin e Përzgjedhjes së Drejtuesit të BKH-së pranë Prokurorisë së Posaçme (SPAK), si dhe vetë institucionin e BKH-së. Gjithashtu, në cilësinë e personit të tretë në këtë proces ishte përfshirë shtetasi Joni Keta.

Trupi gjykues i Apelit Administrativ, i përbërë nga gjyqtarët Altina Nasufi (në cilësinë e relatores), Ardian Dvorani dhe Sokol Ibi, mori në shqyrtim çështjen dhe dëgjoi pretendimet e palëve në seancë gjyqësore. Në përfundim të saj, në datën 7 prill 2026, treshja e gjyqtarëve vendosi unanimisht rrëzimin e padisë si të pabazuar.

Vendimi është marrë duke u mbështetur në Nenin 40/3 të Ligjit Nr. 49/2012 “Për gjykatat administrative dhe gjykimin e mosmarrëveshjeve administrative”.

Me këtë vendimmarrje, gjykata ka vendosur që shpenzimet e këtij procesi t’i lihen në ngarkim palës paditëse. Ndërkohë, palët e përfshira në proces ruajnë të drejtën për të bërë rekurs në Kolegjin Administrativ të Gjykatës së Lartë. Afati për ankimim është 30 ditë dhe nis llogaritjen nga e nesërmja e njoftimit të vendimit të arsyetuar.

/rtsh.al/