Zgjedhjet e ardhshme vendore dhe procedurat e përzgjedhjes së kandidatëve brenda Partisë Socialiste kanë qenë pjesë e debatit televiziv mes deputetes Anila Denaj dhe analistit Arion Sulo. Në qendër të diskutimit ishte Bashkia e Tiranës dhe pretendimet për një garë të mundshme pas zërave për ambiciet e deputetit Erion Braçe.

Denaj: Manastirliu mbetet kandidatja jonë për Tiranën

Kryetarja e komisionit parlamentar, Anila Denaj, u shpreh e prerë se për Partinë Socialiste emri për kryeqytetin është tashmë i vendosur. Ajo theksoi se procesi aktual i “rienergjizimit” të partisë do të zgjasë deri në mes të qershorit, por kjo nuk e ndryshon faktin që Ministrja e Shëndetësisë, Ogerta Manastirliu, është e përzgjedhura.

“PS dhe Kryeministri prej muajit tetor kanë kandidaten për kryetare të Bashkisë së Tiranës. Nuk ka njoftim tjetër, ndaj Manastirliu vijon të jetë kandidate e PS-së për Tiranën,” deklaroi Denaj.

Lidhur me qëndrimet kritike të Erion Braçes, Denaj u shpreh se nuk ka asgjë që e ndalon atë të shprehë mendimet e tij, duke vlerësuar faktin që ai sjell problematika në tryezën e parlamentit, por pa komentuar ambiciet e tij personale për garën.

Sulo: Emërim apo zgjedhje? Problemi me procedurën

Nga ana tjetër, analisti Arion Sulo hodhi dyshime mbi mënyrën se si po operon forca më e madhe politike në vend. Sipas tij, deklaratat e Denajt dëshmojnë se kandidatët po emërohen dhe nuk zgjidhen përmes strukturave bazë, ashtu siç parashikon statuti.

“Manastirliu u emërua dhe nuk u zgjodh,” argumentoi Sulo. Ai shpjegoi se ekziston një procedurë standarde që nis nga propozimi i organizatave, kalon në asambletë e njësive, në Kryesi dhe më pas vjen vendimi final.

Sipas Sulos, nëse PS shpall kandidatin pa kaluar këto filtra, kjo tregon një problem serioz me demokracinë e brendshme. Ai shtoi se kërkesa e Erion Braçes për një garë është legjitime në një parti që pretendon funksionim demokratik.

Gjatë debatit, Denaj nënvizoi se socialistët janë në një fazë intensive takimesh me bazën, ku kontakti me qytetarët mbetet prioriteti kryesor.

/rtsh.al/