Nën drejtimin e Kryetarit të Kuvendit, Niko Peleshi, Këshilli për Rregulloren, Mandatet dhe Imunitetin u mblodh këtë të mërkurë për të shqyrtuar një sërë ndryshimesh në Rregulloren e Kuvendit. Mbledhja u fokusua në propozimet e paraqitura nga deputetë të grupit parlamentar të Partisë Socialiste dhe amendamentet shtesë të hartuara nga vetë Kryetari Peleshi.

Deputeti Taulant Balla, në cilësinë e bashkënismëtarit, prezantoi pikat kyçe të propozimeve, të cilat synojnë modernizimin e procedurave parlamentare. Ndryshimet kryesore lidhen me procedurat e përshpejtuara si trajtimi prioritar i projektligjeve që kanë lidhje me procesin e integrimit të Shqipërisë në Bashkimin Evropian.

Përmirësimi i efikasitetit të seancave plenare përmes rregullimit të kohëzgjatjes së diskutimeve; forcimi i kontrollit post-legjislativ nga komisionet parlamentare; rishikimi i afateve për shqyrtimin e peticioneve dhe iniciativave që vijnë nga qytetarët.

Ndikimi i Gjykatës Kushtetuese

Kryetari Peleshi sqaroi se rendi i ditës u kufizua vetëm në propozimet e reja, duke lënë jashtë çështjet që lidhen me vendimin nr. 57/2025 të Kuvendit, i cili është shfuqizuar së fundmi nga Gjykata Kushtetuese.

Nga ana tjetër, përfaqësuesit e grupit parlamentar të Partisë Demokratike shprehën rezerva lidhur me kohën e shqyrtimit. Deputetët e opozitës kërkuan që diskutimet të shtyhen deri në zbardhjen e plotë të vendimit të Gjykatës Kushtetuese, me argumentin se projektvendimi aktual mund të përmbajë dispozita që bien ndesh me gjetjet e Gjykatës.

Në mbyllje të mbledhjes, Kryetari i Kuvendit nuk hodhi në votim përfundimtar ndryshimet, por inkurajoi të gjitha grupet parlamentare dhe deputetët që të paraqesin propozimet e tyre konkrete. Qëllimi është që amendimet finale të Rregullores të jenë produkt i një diskutimi gjithëpërfshirës brenda Këshillit përpara se t’i kalojnë seancës plenare për miratim.

/rtsh.al/