Forcat e armatosura të Iranit janë të gatshme të japin një “përgjigje të menjëhershme dhe vendimtare” ndaj çdo veprimi të ri armiqësor nga kundërshtarët e tyre, deklaroi komandanti i Shtabit Qendror Khatam al-Anbiya, Ali Abdollahi, sipas agjencisë së lajmeve Tasnim News Agency.

Ai tha se Teherani ka epërsi ushtarake, përfshirë edhe në kontrollin e Ngushticës së Hormuzit, dhe nuk do të lejojë që Donald Trump të “krijojë narrativa të rreme mbi situatën në terren”.

Edhe pse Irani e hapi përkohësisht ngushticën e Hormuzit të premten, ai e mbylli sërish të shtunën (të paktën për vendet që i konsideron “armiqësore”), pasi SHBA nuk hoqi kundër-bllokadën e saj.

Komentet e komandantit vijnë pasi kryetari i parlamentit iranian, Mohammad Bagher Ghalibaf, i cili pritet të drejtojë delegacionin iranian nëse zhvillohen bisedime paqeje në Pakistan, deklaroi se vendi i tij nuk do të marrë pjesë në negociata ndërkohë që është nën kërcënim. Ai paralajmëroi gjithashtu se Irani është “i gatshëm të zbulojë karta të reja në fushën e betejës”.

Nga ana tjetër, Donald Trump, i cili e konsideron rikthimin e trafikut detar në Ngushticën e Hormuzit në nivelet para luftës si prioritet, ka kërcënuar se do të rifillojë bombardimet nëse nuk arrihet një marrëveshje brenda afatit të së mërkurës.