Drejtoria e Forcës së Posaçme Operacionale, në bashkëpunim me partnerët ndërkombëtarë, ka finalizuar me sukses operacionin e koduar “Operacionalja 91”. Gjatë këtij aksioni është bërë i mundur lokalizimi dhe prangosja e një 26-vjeçari të shpallur në kërkim ndërkombëtar nga autoritetet spanjolle, si pjesëtar i një grupi të strukturuar kriminal.

Goditja në Laç dhe akuzat në Spanjë

Shtetasi i arrestuar, i identifikuar me inicialet M. S., 26 vjeç, ishte shpallur në kërkim që prej muajit shkurt të këtij viti. Sipas dosjes hetimore të autoriteteve spanjolle, i riu akuzohet për një sërë veprash të rënda penale, duke përfshirë “Vjedhjen me dhunë”, “Falsifikimin e dokumenteve” dhe “Pjesëmarrjen në grup kriminal”.

Aktiviteti i tij kriminal dyshohet se është shtrirë gjatë vitit të kaluar. Më konkretisht, prokuroria spanjolle pretendon se më 14 dhe 15 mars të vitit 2025, 26-vjeçari ka grabitur me dhunë dy banesa në zona të ndryshme të Spanjës. Gjithashtu, ai akuzohet se, për t’u shpëtuar ndjekjeve të forcave të rendit, ka manipuluar elementet identifikuese të mjeteve duke ndryshuar targat e automjeteve të përdorura në krim.

Bashkëpunimi me Interpol Madrid

Finalizimi i fazës së 91-të të këtij operacioni erdhi si pasojë e një koordinimi të ngushtë të shërbimeve të Drejtorisë së Përgjithshme të Policisë së Shtetit me homologët në Madrid. Shkëmbimi i informacioneve në kohë reale bëri të mundur gjurmimin e të riut deri në fshehjen e tij në qytetin e Laçit.

“Interpol Tirana po vijon bashkëpunimin intensiv me Interpol Madrid për të kryer procedurat e nevojshme diplomatike dhe ligjore, me qëllim ekstradimin e 26-vjeçarit drejt Spanjës, ku do të përballet me akuzat e ngritura,” bëri me dije Policia e Shtetit në njoftimin zyrtar.

/rtsh.al/