Një aksident rrugor me pasojë plagosjen e tetë personave ka ndodhur mbrëmjen e sotme në aksin nacional “Tepelenë–Krahës”.

Sipas informacioneve paraprake, ngjarja ka ndodhur rreth orës 18:30, në vendin e quajtur “Iliras”. Në aksident janë përfshirë një automjet i drejtuar nga një shtetas i huaj dhe një tjetër mjet me drejtuese një shtetase nga Tirana.

Policia e Shtetit bëri të ditur detajet e para mbi mjetet dhe personat e përfshirë:

“Automjeti me drejtues shtetasin indian Sh. P., 27 vjeç, është përplasur me automjetin me drejtuese shtetasen L. B., 42 vjeçe, banuese në Tiranë. Si pasojë e aksidentit, janë dëmtuar lehtë 2 drejtuesit e automjeteve dhe 6 pasagjerë.”

Të tetë të lënduarit janë transportuar me urgjencë drejt Spitalit Rajonal të Gjirokastrës. Burimet mjekësore bëjnë me dije se fatmirësisht personat kanë marrë dëmtime të lehta dhe ndodhen nën kujdesin e mjekëve, jashtë rrezikut për jetën.

Grupi hetimor ka mbërritur në vendin e quajtur “Iliras” dhe po kryen matjet e nevojshme për të përcaktuar shkaqet e aksidentit. Pritet raporti përfundimtar i ekspertëve rrugorë për të zbardhur rrethanat e plota të ngjarjes.

/rtsh.al/