Presidentja e Komisionit Evropian, Ursula von der Leyen, ka dënuar ashpër sulmet me raketa dhe dronë ndaj Emirateve të Bashkuara Arabe, duke bërë thirrje për ulje të menjëhershme të tensioneve në rajon.

Në një reagim në rrjetet sociale, ajo shprehu solidaritetin me Emiratet dhe partnerët në Lindjen e Mesme, duke e cilësuar situatën shqetësuese.

“Sot, partneri ynë, Emiratet e Bashkuara Arabe, ishte sërish shënjestër e sulmeve me raketa dhe dronë nga Irani,” u shpreh ajo.

Von der Leyen theksoi se sulme të tilla janë të papranueshme dhe përbëjnë shkelje të qartë të sovranitetit dhe të drejtës ndërkombëtare.

Ajo nënvizoi gjithashtu se siguria në rajon ka pasoja të drejtpërdrejta për Evropën, duke shtuar se Bashkimi Evropian do të vijojë të punojë ngushtë me partnerët për uljen e tensioneve dhe gjetjen e një zgjidhjeje diplomatike.

“Do të vazhdojmë të angazhohemi për t’i dhënë fund këtyre veprimeve dhe për të garantuar stabilitetin në rajon,” përfundoi presidentja e Komisionit Evropian.

/rtsh.al/