Ka nisur seanca e sotme plenare, ndërsa Interpelancat e parashikuara në rend dite, 2 me kryeministrin Edi Rama dhe 1 me Ministrin e Brendshëm Besfort Lamallari, do të shtyhen.

Kreu i Kuvendit, Niko Peleshi bëri me dije se interpelancat nuk mund të zhvillohen sot për shkak të angazhimeve shtetërore të kryeministrit Rama dhe ministrit Lamallari. Ato do të zhvillohen në seancën e radhës.

Deputetët e Grupit Parlamentar demokrat kishin kërkuar një interpelancë urgjente me kryeministrin Edi Rama dhe me Ministrin e Punëve të Brendshme, Besfor Lamallari.
Po ashtu, interpelancë me kryeministrin Rama ishte kërkuar edhe nga kreu i Partisë Mundësia, Agron Shehaj dhe deputeti Erald Kapri.

Seanca përfshin edhe një seancë pyetje-përgjigje me ministren e Shëndetësisë, Evis Sala, të kërkuar nga deputeti Erald Kapri.

Ndër projektligjet që do të shqyrtohen janë ratifikimi i kontratës financiare me Bankën Evropiane të Investimeve për projektin “Porta e Alpeve”, ndryshime në ligjin për infrastrukturën kombëtare të informacionit gjeohapësinor, ndryshime në ligjin për burimet ujore, si dhe disa amendime në Rregulloren e Kuvendit.

Në përfundim të seancës janë parashikuar diskutime për çështje jashtë rendit të ditës.

/rtsh.al/