Një 48-vjeçar ka rënë në prangat e Policisë së Kurbinit, i dyshuar për veprimtari kriminale në fushën e narkotikëve. Gjatë një operacioni të koduar “Veprimtaria”, uniformat blu zbuluan në banesën e tij sasi heroine të gatshme për shpërndarje, si dhe një parcelë me bimë narkotike të kultivuara në oborr.

Operacioni u zhvillua nga shërbimet e Komisariatit të Policisë Kurbin, në bashkëpunim me Sektorin e Forcës së Posaçme “Shqiponja” dhe Specialistët e Seksionit për Hetimin e Narkotikëve në DVP Lezhë, pas informacioneve të siguruara në rrugë operative dhe kontrolleve intensive në territor.

Si rezultat i ndërhyrjes, u arrestua në flagrancë shtetasi S. K., 48 vjeç, banues në Kurbin. Gjatë kontrollit në banesën e tij, në fshatin Fushë-Kuqe, policia gjeti dhe sekuestroi 776 gramë lëndë narkotike të dyshuar heroinë, si dhe një peshore elektronike që dyshohet se përdorej për peshimin dhe ndarjen e dozave.

Po ashtu, në oborrin e banesës u konstatuan 144 bimë të dyshuara narkotike cannabis sativa të kultivuara. Bimët u asgjësuan me anë të djegies, ndërsa një pjesë e tyre u sekuestrua në cilësinë e provës materiale për nevojat e hetimit.

Sipas policisë, 48-vjeçari dyshohet se furnizonte persona të tjerë dhe shpërndante lëndë narkotike heroinë në zonë.

Hetimet vijojnë në bashkëpunim me Prokurorinë për dokumentimin e plotë të veprimtarisë kriminale dhe për identifikimin e personave të tjerë që mund të jenë të përfshirë në këtë aktivitet të paligjshëm. Materialet procedurale i janë referuar Prokurorisë për veprime të mëtejshme.

/rtsh.al/