Parlamenti Europian miratoi përfundimisht një ligj të ri europian që synim ka përshpejtimin e procedurave të deportimit të migrantëve që nuk kanë të drejtë të qëndrojnë në territorin e vendeve të bllokut.

Me 418 vota pro dhe 218 kundër, eurodeputetët i dhanë kështu dritën jeshile ngritjes në vendet jashtë BE-së të qendrave për kthimin e migrantëve të jashtëligjshëm, një lëvizje kjo që u mbështet fuqishëm nga grupet e qendrës së djathtë dhe ato të ekstremit të djathtë.

Nën legjislacionin e ri, migrantët që refuzojnë të bashkëpunojnë me autoritetet dhe që nuk pranojnë të largohen nga vendet e bllokut do të përballen me masa të rrepta që parashikojnë deri në dy vite paraburgim.

“Kjo rregullore përcjell mesazhin se jemi ne dhe jo trafikantët e qenieve njerëzore ata që vendosin se kush duhet të qëndrojë dhe kush do të largohet nga Bashkimi Europian,” u shpreh eurokomisioneri për migracionin Magnus Brunner.

Legjislacioni ndërkohë është kritikuar nga grupet e të drejtave të njeriut dhe politikanët e majtë, sipas të cilëve ai rrezikon të stigmatizojë migrantët dhe të nxisë polarizimin në një kohë kur shoqëritë kanë nevojë për kohezion më të madh.

Nën rregullat e reja, autoritetet e shteteve anëtare lejohen të ushtrojnë kontrolle ndaj shtetasve të vendeve të treta, të bastisin banesat e tyre apo mjedise të tjera dhe të konfiskojnë sendet personale.

Alessandro Zan i grupit të qendrës së majtë të socialdemokratëve reformën e cilësoi një kapitull të errët për Europën.

“I hap rrugë deportimeve të detyruara dhe normalizimit të ndalimit edhe të njerëzve që nuk kryejnë ndonjë krim,” u shpreh ai.

/rtsh.al/