Policia ka zbardhur dhe dokumentuar ngjarjen e ndodhur mbrëmjen e së premtes në zonën e Babrrusë, ku një 18-vjeçar qëlloi me armë zjarri automatike në drejtim të një servisi celularësh, pas një konflikti me pronarin e biznesit.

Aautori i dyshuar, R. M., 18 vjeç, pas një konflikti për motive të dobëta me pronarin e servisit, shtetasin Xh. I., ka qëlluar dy herë me armë zjarri automatike në drejtim të biznesit.

Nga të shtënat janë shkaktuar vetëm dëme materiale në fasadën e jashtme dhe në ambientet e brendshme të servisit, ndërsa nuk raportohet për persona të lënduar.

Në kuadër të operacionit policor të koduar “Zbulimi”, autori u arrestua pak kohë pas ngjarjes. Ai u kap rreth 3 kilometra larg vendit ku ndodhi sulmi.

Gjatë kontrolleve në zonë, shërbimet e Policisë gjetën dhe sekuestruan armën e zjarrit automatike të dyshuar të përdorur në ngjarje, si dhe municion luftarak.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të rrethanave të ngjarjes.

/rtsh.al/