Lëvizje në merkaton e futbollit shqiptar. Sherif Kallaku nuk do të jetë më pjesë e Vllaznisë, pasi mesfushori ofensiv është transferuar zyrtarisht te Teuta, klub ku rikthehet pas eksperiencave të mëparshme në Durrës.

Klubi shkodran konfirmoi arritjen e marrëveshjes me Teutën për transferimin e 28-vjeçarit dhe i shprehu mirënjohjen futbollistit për profesionalizmin dhe kontributin e dhënë me fanellën kuqeblu.

Në reagimin e saj zyrtar, Vllaznia shkruan: “Falënderojmë Sherifin për profesionalizmin, përkushtimin dhe kontributin e dhënë me fanellën kuqeblu gjatë kohës që ishte pjesë e klubit tonë. I urojmë suksese në vazhdim të karrierës së tij sportive.”

Nga ana tjetër, Teuta e ka pritur me entuziazëm rikthimin e Kallakut, duke e cilësuar atë si një rikthim “në shtëpi”. Klubi durrsak beson se eksperienca, cilësia dhe lidershipi i mesfushorit do të jenë një vlerë e shtuar për objektivat e sezonit të ri.

“Mirë se vjen në shtëpi, Sherif!” – ishte mesazhi i Teutës në prezantimin zyrtar të futbollistit. Klubi nënvizoi se Kallaku rikthehet për të vënë në shërbim të skuadrës cilësinë, eksperiencën dhe energjinë e tij.

Për 28-vjeçarin ka veshur fanellën e Teutës në periudhën 2018–2020, ndërsa më pas provoi edhe një aventurë jashtë Shqipërisë me Sepsi. Tashmë, pas një sezoni te Vllaznia, Kallaku nis një kapitull të ri në Durrës, me synimin për të qenë një nga liderët e skuadrës bregdetare.