Inteligjenca artificiale po ndryshon me shpejtësi mënyrën se si funksionojnë sistemet shëndetësore në Europë, por Organizata Botërore e Shëndetësisë ka ngritur alarmin për mungesën e rregullave që duhet të shoqërojnë këtë zhvillim.

Drejtori rajonal i OBSH-së për Europën, Hans Henri P. Kluge, tha se hendeku mes përdorimit të teknologjisë dhe rregullimit të saj është bërë një sfidë serioze. Sipas tij, sa më gjatë të mungojnë rregullat e qarta, aq më të mëdha do të jenë pasojat për pacientët.

Kluge paralajmëroi se algoritmet e paragjykuara mund të çojnë në diagnoza të gabuara dhe të rrezikojnë drejtpërdrejt shëndetin e njerëzve. Të dhënat e OBSH-së tregojnë se dy të tretat e vendeve të rajonit europian përdorin tashmë inteligjencën artificiale për diagnostikim. Rreth gjysma e tyre kanë edhe chatbot-e që komunikojnë me pacientët përmes kësaj teknologjie.

Megjithatë, vetëm një në dymbëdhjetë vende ka një strategji të posaçme për qeverisjen e inteligjencës artificiale në shëndetësi. Raporti tregon gjithashtu se vetëm 8 për qind e vendeve kanë hartuar një strategji kombëtare për përdorimin e saj në këtë sektor.

Ndërkohë, afro 40 për qind e shteteve nuk kanë ende udhëzime etike për përdorimin e inteligjencës artificiale në institucionet shëndetësore. OBSH u bëri thirrje vendeve europiane të veprojnë sa më shpejt për të garantuar që zhvillimi i teknologjisë të shoqërohet me siguri, transparencë dhe mbrojtje për pacientët.

/rtsh.al/