Qeveria e Shteteve të Bashkuara ka lëshuar akuza të rënda ndaj Kubës, duke e deklaruar atë përgjegjëse për zhvillimin e një fushate spiunazhi të shtrirë në disa dekada. Sipas autoriteteve amerikane, ky operacion i inteligjencës së Havanës ka arritur të depërtojë deri në strukturat më të larta të administratës në Uashington.

Në një deklaratë zyrtare të lëshuar nga Departamenti i Shtetit i SHBA-së, bëhet e ditur se rrjeti i inteligjencës kubane ka vepruar në mënyrë metodike përgjatë viteve. Akuzat specifikojnë se Havana zyrtare jo vetëm që ka rekrutuar operativë brenda institucioneve qeveritare, por ka ndikuar edhe në lëvizjet sociale brenda vendit.

Sipas vlerësimit të Departamentit të Shtetit, Kuba “ka infiltruar nivelet më të larta të qeverisë amerikane, ka rekrutuar dhe kultivuar breza të tërë aktivistësh amerikanë dhe ka mbështetur një valë të paparë terrorizmi të krahut të majtë në tokën amerikane”.

Kjo veprimtari e koordinuar, sipas tyre, ka cenuar elemente kyçe të sigurisë kombëtare.

Analistët e inteligjencës amerikane e kanë klasifikuar këtë operacion si jashtëzakonisht specifik për nga kohëzgjatja dhe ndikimi. Në dokumentet e bëra publike, Departamenti i Shtetit e cilëson këtë fushatë si “një nga depërtimet më afatgjata dhe më dëmtuese të inteligjencës së huaj në historinë amerikane”.

Deri më tani, ky deklarim shënon një nga tensionet më të forta diplomatike dhe të zbulimit midis dy vendeve në vitet e fundit, ndërsa mbeten në pritje reagimet zyrtare nga autoritetet në Havanë lidhur me këto pretendime.

/rtsh.al/