Presidenti i Shteteve të Bashkuara, Donald Trump, po bëhet gati të shpallë një seri të re tarifash tregtare që do të prekin dhjetëra shtete partnere. Lëvizja vjen në një kohë kur këshilltarët e tij më të afërt ekonomikë po e paralajmërojnë prapa skenave për rrezikun e një përsëritjeje të tronditjeve tregtare në prag të zgjedhjeve të mesmandatit.

Sipas raportimeve të Financial Times, zyrtarët amerikanë kanë hartuar disa skenarë ligjorë për të zëvendësuar regjimin ekzistues prej 10% që skadon në fund të kësaj jave. Paralelisht me këtë plan, Trump njoftoi tarifa prej 50% mbi mallrat kanadeze, menjëherë pas vendosjes së tarifës 25% ndaj importeve braziliane.

Strategjia e re ligjore pas vendimit të Gjykatës Supreme

Kjo valë e re masash vjen pas një goditjeje ligjore që administrata pësoi në fillim të këtij viti, kur Gjykata Supreme rrëzoi tarifat reciproke të shpallura pas njoftimit të “Ditës së Çlirimit” në prill 2025. Për të kaluar këtë pengesë, Uashingtoni vendosi përkohësisht një regjim prej 10% në shkurt, por koha e tij skadon këtë të premte.

Për të shmangur thirrjen e kompetencave të emergjencës kombëtare — të cilat u rrëzuan nga Gjykata Supreme — administrata po përdor hetimet mbi praktikat e punës së detyruar sipas Seksionit 301 të Aktit të Tregtisë të vitit 1974.

“Seti i ri i tarifave do të futet pas një hetimi mbi praktikat e punës së detyruar, duke i lejuar Trump të shmangë thirrjen e kompetencave të emergjencës të rrëzuara nga Gjykata Supreme.”, raportonFinancial Times.

Hetimi aktual përfshin partnerë kyç tregtarë si Bashkimi Evropian, Kina, Japonia, India, Meksika, Korea e Jugut, Zvicra, Britania, si dhe disa vende të Azisë Juglindore. Propozimet parashikojnë tarifa nga 10% deri në 12.5% për rreth 60 vende.

Shqetësimet e këshilltarëve dhe sfidat gjeopolitike

Prapa skenave, zyrtarë të lartë tregtarë i kanë kërkuar presidentit të ruajë stabilitetin me aleatët dhe të respektojë marrëveshjet e arritura në vitin 2025 për uljen e tarifave. Paralelisht, dy hetime të tjera tregtare mbi mineralet kritike dhe pjesët e avionëve kanë përfunduar me rekomandimin e zyrtarëve për negociata dypalëshe në vend të tarifave të reja.

“Zyrtarët e lartë e kanë këshilluar presidentin prapa skenave që të ruajë stabilitetin me partnerët tregtarë dhe të respektojë marrëveshjet e Uashingtonit për të ulur tarifat.”, thkeson shkrimi.

Përpjekja për të rindezur luftën tregtare përkon me tensione në rritje midis SHBA-së dhe Iranit, faktor ky që ka sjellë paqëndrueshmëri në tregjet globale të energjisë dhe rrezikon të thellojë krizën rajonale.

Perspektiva

Përveç tarifave të menjëhershme prej 10% deri 12.5%, Uashingtoni po punon edhe për hetime të tjera paralele (përfshirë mbikapacitetin prodhues) që mund t’i japin administratës autoritet ligjor për aplikimin e tarifave akoma më të larta në të ardhmen. Mbetet për t’u parë se si tregjet financiare dhe partnerët ndërkombëtarë do t’i përgjigjen kësaj valës së re rregullatore në ditët në vijim.

/rtsh.al/