Aeroporti Ndërkombëtar i Erbilit ka njoftuar pezullimin e përkohshëm të të gjitha pas një vale sulmesh që kanë synuar qytetin e Erbilit dhe hapësirën ajrore të tij.

Drejtori i aeroportit, Ahmed Hoshyar, deklaroi për Agjencinë e Lajmeve të Irakut se “fluturimet drejt dhe nga Aeroporti i Erbil-it janë pezulluar përkohësisht për shkak të valës së sulmeve që kanë goditur qytetin e Erbilit dhe hapësirën e tij ajrore”.

Ai shtoi se fluturimet do të rifillojnë sapo situata e sigurisë të stabilizohet dhe të kthehet në normalitet. Ky vendim vjen në një moment tensioni të lartë në Irakun verior.

Gjatë fundjavës, një ushtar amerikan ka humbur jetën ndërsa po përpiqej të çaktivizonte një dron iranian në një bazë ajrore në qytetin e Erbil-it.

Ngjarja ka rritur shqetësimet për sigurinë në rajon, ku prania ushtarake amerikane dhe tensionet me grupe të lidhura me Iranin kanë qenë të shpeshta vitet e fundit.

Erbili, kryeqyteti i Rajonit të Kurdistanit Irakian, është konsideruar prej kohësh një zonë relativisht e qetë krahasuar me pjesët e tjera të Irakut.

Megjithatë, sulmet me dronë dhe raketa kanë ndodhur herë pas here, kryesisht të atribuar grupeve milicore të mbështetura nga Irani. Pezullimi i fluturimeve ndikon drejtpërdrejt në udhëtimet civile dhe tregtare, duke prekur mijëra pasagjerë dhe aktivitetin ekonomik të rajonit.

Autoritetet lokale dhe koalicioni ndërkombëtar i udhëhequr nga SHBA po monitorojnë situatën. Nuk ka ende një afat të saktë për rifillimin e fluturimeve, pasi kjo varet nga zhvillimet në terren dhe masat e sigurisë së marra.

Aeroporti i Erbil-it është një nga portat kryesore ajrore të Irakut verior, me fluturime drejt destinacioneve europiane, aziatike dhe të Lindjes së Mesme. Pezullimi i tij mund të ketë efekte zinxhir në lidhjet ajrore rajonale.Përditësime:

Autoritetet irakiane dhe kurde ende nuk kanë dhënë detaje të mëtejshme mbi natyrën e saktë të “valës së sulmeve”.

/rtsh.al/