Bashkëpunimi mes shërbimeve zjarrfikëse, Kukësi dhe Prizreni, ndërhyrje të përbashkëta në raste emergjente

Është periudha me risk të lartë për shfaqjen e zjarreve në pyje. Për vetë pozitën gjeografike dhe masivet pyjore që shtrihen në rajonet e Kukësit e Prizrenit, bashkëpunimi mes shërbimeve zjarrfikëse është në një nivel të lartë. Komandanti i Shërbimit Zjarrfikës të Prizrenit, Flamur Hoti, thotë se me Kukësin ka plane konkrete për ndërhyrje të përbashkëta.

“Kemi pasur edhe vitet e kaluara tre incidente zjarri në brezin kufitar, ku kemi bashkëpunuar shumë mirë me ekipet e zjarrfikësve të Kukësit. Kemi disa plane për sivjet për parandalim”, tha ai.

Vija kufitare, siç njihet ndryshe brezi i butë i Klonit, për komandantin Hoti mund të shfrytëzohet më së miri për të kufizuar përhapjen e zjarreve në të dy anët e kufirit.

Bashkëpunimi ndërmjet shërbimeve të Emergjencave Civile dhe zjarrfikësve është rregulluar edhe me marrëveshje ndërshtetërore të Shqipërisë dhe Kosovës.

Nga ana tjetër, në këtë periudhë me temperatura të larta, shërbimi zjarrfikës i Prizrenit ka intensifikuar monitorimet në terren për të parandaluar shfaqjen e zjarreve në pyje, duke vënë në dispozicion edhe kapacitete teknologjike me dron.

Ky shërbim ka një shkallë të lartë gatishmërie, e shoqëruar edhe me kapacitete mjetesh e teknike për ndërhyrje.

Ky shërbim disponon mjete të kalueshmërisë së lartë dhe me një teknologji efikase.

Kujtojmë se shërbimet zjarrfikëse të Prizrenit janë angazhuar për ndërhyrje jo vetëm në shfaqjen e zjarreve në pyje dhe në qytetin e Kukësit, por edhe në misionet e kërkim-shpëtimit gjatë tërmetit apo edhe në zonat e përmbytura në Lezhë e Shkodër.

Gazetar: Bujar Muçmata     

/rtsh.al/