Irani publikoi një video të rrallë të Udhëheqësit Suprem Mojtaba Khamenei, pas raportimeve se ai ndodhej në gjendje kritike shëndetësore, transmeton Anadolu.

Videoja, e transmetuar nga agjencia gjysmëzyrtare e lajmeve Mehr, e shfaq Mojtaba Khamenein të rrethuar nga disa persona dhe dukej se po u drejtohej atyre.

Mehr nuk bëri të ditur se kur dhe ku ishte regjistruar videoja dhe as nuk identifikoi personat që e shoqëronin.

Agjencia raportoi të dielën se Mojtaba u takua me presidentin iranian Masoud Pezeshkian, i cili po fillon vitin e tretë në detyrë.

Në takim u diskutuan sfidat aktuale me të cilat përballet Irani, përfshirë nevojat e popullsisë për mirëqenie dhe konfliktin ushtarak me SHBA-në, “si dhe ndërveprimin ekonomik me partnerët e huaj”, shtoi agjencia.

Mojtaba u zgjodh Udhëheqës Suprem i Iranit në fillim të marsit, pasi babai i tij, Ali Khamenei, u vra në një sulm ajror amerikano-izraelit më 28 shkurt. Që nga zgjedhja e tij, ai nuk është shfaqur asnjëherë në publik.

Irani dhe SHBA-ja ranë dakord për një armëpushim në prill dhe më pas nënshkruan një memorandum mirëkuptimi në qershor, që synonte t’i jepte fund konfliktit ushtarak dhe të arrihej një marrëveshje e qëndrueshme paqeje.

Megjithatë, marrëveshja u rrëzua muajin e kaluar, ndërsa Teherani dhe Washingtoni shkëmbyen sulme për gati dy javë, para se presidenti amerikan Donald Trump të ndalte papritur bombardimet mes raportimeve për bisedime për zgjidhjen e konfliktit.

/rtsh.al/