Autoritetet federale amerikane kanë bërë publike një aktakuzë të rëndë ndaj shërbimeve të inteligjencës ruse, të cilat dyshohet se kanë komplotuar për të kryer vrasje të synuara në Shtetet e Bashkuara dhe në vendet evropiane që mbështesin Ukrainën.

Akuza u shpall të martën në gjykatën federale të Manhattanit, ku u njoftua se pesë persona të përfshirë në rrjet mbeten ende të lirë.

Sipas aktakuzës, rrjeti i inteligjencës ruse kishte paguar dhe tentuar të paguante individë në SHBA dhe jashtë saj për të mbikëqyrur objektiva që më pas do të eliminoheshin.

Bashkëpunëtorët e rekrutuar ishin ftuar gjithashtu të kryenin akte terrorizmi kundër infrastrukturës civile dhe ushtarake në vendet evropiane të lidhura me Ukrainën.

Ky rrjet, i përshkruar si “një krah i aparatit të Federatës Ruse për sulme të jashtme”, kishte vepruar të paktën që nga viti 2024, fillimisht duke shënjestruar disidentë dhe dezertorë rusë, ndërsa së fundmi kishte zgjeruar objektivat drejt kombeve aleate të Ukrainës.

Autoritetet thanë se këtë verë rrjeti rekrutoi një individ me bazë në SHBA për të mbikëqyrur një disident rus të shquar. Personi kreu mbikëqyrjen, dorëzoi fotografi dhe video të vendeve të lidhura me viktimën, por refuzoi ofertën prej 40,000 dollarësh për ta “eliminuar” objektivin.

Pas refuzimit, rrjeti u përpoq të rekrutonte persona të tjerë brenda SHBA-së, duke ofruar shuma të konsiderueshme parash.

James Barnacle Jr, kreu i zyrës së FBI-së në Nju Jork, deklaroi se planet u prishën “përmes punës së palodhur” të agjentëve federalë, duke theksuar se rrjeti rus kishte komplotuar për të frikësuar, kërcënuar dhe vrarë njerëz në tokën amerikane dhe në mbarë botën.

Darren Cox, kreu i zyrës së FBI-së në Uashington, përmendi “punën e jashtëzakonshme” të zyrave në terren dhe agjencive partnere që penguan përpjekjet e Rusisë për të kryer akte të dhunshme në kryeqytetin amerikan dhe në gjithë vendin. Ai shtoi se FBI-ja veproi shpejt për të prishur komplotin dhe për ta mbajtur qeverinë ruse përgjegjëse.

/rtsh.al/