Deputetja e Partisë Demokratike, Jorida Tabaku, ka pritur në një takim kryetarin e Komisionit për Çështjet Europiane të Bundestagut gjerman, Anton Hofreiter. Përmes një video të publikuar në rrjetin social Facebook, Tabaku bën me dije se në takimin me Hofreiter kanë diskutuar mbi integrim e Shqipërisë në Bashkimin Europian.

Sipas Tabakut, pala gjermane ka shprehur shqetësime lidhur me sundimin e ligjit, mbrojtjen e natyrës dhe respektimin e standardeve të grupkapitullit “Themeloret”. Tabaku u shpreh se Shqipëria ndodhet përpara një zgjedhjeje të qartë: të vijojë rrugën drejt Bashkimit Europian dhe vlerave të tij, apo të largohet prej tyre.

“Integrimi nuk është propagandë. Ai do të thotë një shtet i së drejtës, ku drejtësia nuk pengohet nga forca e kartonëve në Parlament dhe ku ligjbërja nuk shndërrohet në noteri të interesave të një pakice”, deklaroi Tabaku.

Deputetja e opozitës kritikoi gjithashtu qeverinë për zbatimin e standardeve europiane, duke argumentuar se Shqipëria mbetet pas në procesin e integrimit.

“Nëse sot jemi pas Malit të Zi dhe ende të papërgatitur, kjo është pasojë e një qeverisjeje që nuk ka vullnet të zbatojë as frymën, as germën e ligjeve të BE-së”, u shpreh ajo.