Këtë vit muaji i Ramazanit përkon me muajt dimërorë, çka e bën më të lehtë për besimtarët. Teksa flet për rëndësinë e këtyre ditëve, nënkryetari i Komunitetit Mysliman, Taulant Bici, ndalet edhe te shpërblimi që marrin besimtarët, veçanërisht për atë që njihet si Nata e Kadrit.

“Muaji i Ramazanit është një muaj që pritet me padurim për t’u ndalur pak, për të reflektuar dhe për të ristartuar edhe njëherë mënyrën e jetesës, brenda kornizave që Zoti dëshiron që ne të jetojmë. Pra, një njeri i kompletuar me virtyte. Kush jep një iftar një agjëruesi merr të njëjtin shpërblim sikurse ai që ka agjëruar”, tha Bici.

Nata e Kadrit shënon një tjetër pikë kulmore të këtij muaji të begatë për besimtarët myslimanë, në 10-ditëshin e fundit.

“Vlera e kësaj nate është shumë e madhe, pra ashtu sikurse ka ndryshim një ditë Ramazani nga një ditë tjetër normale, po ashtu ka ndryshim Nata e Kadrit nga ditët e tjera, sepse Zoti ka zbritur një sure enkas për këtë natë dhe në të thuhet se kjo natë vlen më shumë se 1 mijë muaj”, nënvizoi ai.

Vitet e fundit janë të shumtë të rinjtë që i drejtohen besimit në Zot.

“Pjesa që e mbush xhaminë dhe sheshin për faljen e Bajrameve, 90 për qind janë moshat e reja”, tha ai.

Ramazani përkujton zbritjen e parë të Kuranit nga Profeti Muhamed. Agjërimi përfaqëson një nga pesë shtyllat e Islamit dhe, sipas fesë, konsiderohet obligim për të gjithë të rriturit që nuk kanë probleme shëndetësore.

Gazetare: Elda Hasanbelli

/rtsh.al/