Gjatë muajit prill, në qendrën shëndetësore Bicaj nuk kanë munguar pacientët që kërkojnë shërbim mjekësor për shkak të alergjive. Mjekja Pamela Fejzullari shpjegon se alergjitë stinore janë një shqetësim i zakonshëm ku ndryshe nga gripi sezonal, ato nuk shoqërohen me temperaturë të lartë.

“Që me fillimin e stinës së pranverës janë shtuar dhe rastet e pacientëve që vijnë me shenja të alergjisë të cilat mund të ngatërrohen edhe me shenjat e gripit sezonal. Simptomat më të zakonshme janë rrufa, lotimi dhe kruarja e syve, teshtima”, u shpreh mjekja Pamela Fejzullau.

Sa i përket të prekurve nga alergjitë stinore, sipas mjekes Fejzullari, shumë prej tyre referohen edhe te mjeku specialist. Ndërkohë, numri i pacientëve që vuajnë nga gripi është në rënie.

“Zakonisht alergjia fillon që në fëmijërinë e hershme dhe këto individ janë më të predispozuar nga alergjive”, tha mjekja.

Në qendrën shëndetësore Bicaj marrin shërbim mjekësor rreth 30 pacientë në 24 orë, ndërsa kjo qendër u shërben rreth 6,000 banorëve të kësaj njësie administrative.

Gazetare: S. Elezaj

/rtsh.al/