Finalizohet operacioni policor i koduar “Opportunity”, i zhvilluar nga Komisariati i Policisë Librazhd, në bashkëpunim me Seksionin për Hetimin e Krimeve kundër Personit në DVP Elbasan dhe nën drejtimin e Prokurorisë së Elbasanit.

Policia ka vënë në pranga një 36-vjeçar, i identifikuar me inicialet I. K., i cili dyshohet se i ka administruar një sasi të lartë medikamenti qetësues (të dyshuar si valium) çiftit të moshuar, të afërm të tij, dhe më pas ka vjedhur një shumë parash në banesën e tyre. Si pasojë e intoksikimit, dy bashkëshortët u dërguan fillimisht në spitalin e Librazhdit dhe më pas në QSUT, në gjendje të rënduar shëndetësore, por aktualisht ndodhen jashtë rrezikut për jetën.

Falë veprimeve të shpejta dhe të koordinuara hetimore, u bë e mundur zbardhja e plotë e ngjarjes dhe arrestimi i autorit të dyshuar. Gjatë operacionit u sekuestruan shuma e parave të vjedhura dhe një telefon celular, të cilat dyshohet se janë përdorur gjatë kryerjes së krimit.

Materialet procedurale i janë referuar Prokurorisë së Elbasanit, për veprime të mëtejshme ligjore.

/rtsh.al/