Ndalimi i përdorimit të mediave sociale nga fëmijët nën 16 vjeç hyri në fuqi këtë të mërkurë (10 dhjetor) në Australi, masë që Kryeministri Anthony Albanese e përshëndeti si një fitore të madhe për familjet, por që sipas tij do të jetë e vështirë për t’u zbatuar plotësisht.

Prindër të shumtë raportuan se fëmijët e tyre zbuluan me shqetësim se llogaritë e tyre ishin bllokuar nga platformat. Disa të mitur madje pretenduan se kishin mashtruar sistemet e vlerësimit të moshës duke vizatuar qime në fytyrë, ndërsa pritet që të tjerë të ndihmohen nga familjarë më të mëdhenj për të anashkaluar kufizimet.

 “Kjo është dita kur familjet australiane po marrin përsëri pushtetin nga kompanitë e mëdha të teknologjisë dhe po mbrojnë të drejtën e fëmijëve për të qenë fëmijë,” tha Albanese për Australian Broadcasting Corp., duke shtuar se ligji u jep prindërve “më shumë qetësi mendore”.

Gjatë një aktiviteti në Kirribilli House në Sydney, ku u shfaq duke gatuar në një barbeque për të shënuar nisjen e ndalimit, Albanese vuri në dukje se reforma është duke u ndjekur me interes edhe në nivel ndërkombëtar.

“Kjo reformë do të ndryshojë jetë… Komuniteti global po e shikon Australinë dhe thotë: nëse Australia mund ta bëjë, pse jo edhe ne?”, u shpreh ai para mbështetësve, përfshirë prindër që fajësojnë platformat sociale për tragjedi familjare.

Sipas ligjit të ri, të gjitha platformat kryesore, përfshirë Facebook, Instagram, Kick, Reddit, Snapchat, Threads, TikTok, X, YouTube dhe Twitch, rrezikojnë gjoba deri në 49.5 milionë dollarë australianë (32.9 milionë dollarë amerikanë) nëse nuk heqin llogaritë e përdoruesve australianë nën 16 vjeç.

/rtsh.al/