E gjithë bota e krishterë kremton Krishtlindjen. Besimtarë të shumtë iu drejtuan Katedrales Shën Pali në Tiranë gjatë meshës së Vigjiljes, mbajtur mesnatën e së mërkurës.

Kremtimet liturgjike të Krishtlindjes nisën në orën 23:00, ndërsa shumë prej qytetarëve e ndoqën edhe në monitorin e vendosur në ambientin e jashtëm të katedrales.

Solemniteti i Krishtlindjes u përcoll përmes mesazhit nga Arkipeshkvi i Dioqezës së Tiranë-Durrësit Imzot Arjan Dodaj, i cili dha edhe një intervistë për RTSH-në.

“Mesazhi kalon nëpërmjet butësisë së Zotit. Është e fortë gjithçka që Zoti përcjell me hijen e tij. Zoti është i forti midis nesh, ne jemi të brishtë. Uroj që shqiptarët të përjetojnë një Krishtlindje ku në takimin me Zotin të ndryshojë me të vërtetë gjithmonë e për më mirë vendi ynë dhe të rinjtë të gjejnë shpresë për të investuar te vendi ynë ekzistencën e tyre në këtë vend”, u shpreh Imzot Arjan Dodaj.

Të gjithë të krishterët festojnë lindjen e Birit të Zotit, Jezu Krishtit duke uruar njëri-tjetrin. Kremtimet dhe mesha e mbajtur në Katedralen Ortodoske Ngjalla e Krishit bëri bashkë besimatërt ortodoksë, të cilët ndoqën meshën e drejtuar nga Kryepeskopi Joan Pelushi

Mes urimeve, besimtarëve  vijojnë takimet me familarët në shtrimin e tryezës së festës

Simbol i Krishtlindjes është pema, ndërsa dhuratat simbolizojnë çka dhuruan barinjtë dhe të Mbretërit Dijetarë për Krishtin Fëmijë. Kisha kremton dëftimin e Fjalës së Zotit për njerëzit, me urimin e paqes dhe dashurisë.

Gazetare: E. Hasanbelli    

/rtsh.al/