Mijëra njerëz mbushën Sheshin e Lindjes së Krishtit në Betlehem në pritje të meshës së Krishtlindjes.

Shumë banorë të Betlehemit dhe qyteteve palestineze të Beit Jala dhe Beit Sahour, pjesë e komunitetit të krishterë, ndoqën paradën, ku më vonë Kardinali Pierbattista Pizzaballa, Patriarku Latin i Jerusalemit do të drejtojë Meshën e Mesnatës në Kishën e Lindjes së Krishtit. Në këtë shërbesë zakonisht marrin pjesë zyrtarë të lartë, siç është edhe Presidenti Palestinez Mahmoud Abbas.

Këtë vit për herë të parë që nga nisja e luftës në tetor të vitit 2023, qyteti i Betlehemit, i njohur në mbarë botën si vendlindja e Jezu Krishtit, ndezi edhe pemën tradicionale të Krishtlindjes.

Ceremonitë gjatë këtij muaji janë  shoqëruar me lutje për paqe dhe shpresë, ndërsa u bë thirrje që qyteti i shenjtë të rikthehet sërish si destinacion për pelegrinët dhe turistët nga e gjithë bota.

Edhe pse Gaza është rreth 60 km larg Betlehemit, lufta ka prekur rëndë palestinezët në Bregun Perëndimor të pushtuar nga Izraeli dhe ka shkatërruar turizmin ku mbështetet ekonomia e Betlehemit.

Gazetare: Vjollca Zharri

/rtsh.al/