Rritja e çmimit të naftës gjatë javëve të fundit ka ndikuar në disa sektorë të ekonomisë. Megjithatë, në transportin urban, kjo rritje nuk është reflektuar në çmimin e biletave.

Fatmir Halili, drejtues i kompanisë së transportit “Fat 5”, e cila operon në mbi katër linja, shprehet se pavarësisht rritjes së kostos së karburantit, çmimi i biletës ka mbetur i pandryshuar.

Sipas tij, kompania ka bërë përpjekje për të minimizuar fitimin, me qëllim që qytetarët të mos përballen me rritje të çmimeve.

Ndërkohë, në Kukës, një pjesë e qytetarëve zgjedhin të furnizohen me naftë në Kosovë, konkretisht në Prizren, duke e konsideruar atë më të lirë.

Pavarësisht rritjes së çmimit të naftës, në qytetin e Kukësit nuk vërehet ulje e lëvizjes së automjeteve. Kjo evidentohet lehtësisht nga numri i lartë i mjeteve në qarkullim.

Nga ana tjetër, pritet që në ditët në vijim çmimi i naftës të pësojë rënie, pas armëpushimit dyjavor mes SHBA-së dhe Iranit.

/rtsh.al/