Gazment Bardhi, kreu i grupit parlamentar demokrat, akuzoi mazhorancën në Kuvend se ka përjashtuar opozitën nga procesi i integrimit europian. Sipas Bardhit, opozitës nuk i është vënë në dispozicion listën e projektligjeve që duhen votuar.

 “Është fakt që ë Konferencën e Kryetarëve, grupi parlamentar i PD ka kërkuar ti vihet në dispozicion lista e draft ligjeve që ky Kuvend duhet të votojë në kuadër të procesit të  integrimit në BE. E kemi kërkuar në çdo mbledhje dhe vini këtu dhe thoni ju nuk keni votuar  ligjet. Po nga ta dimë ne cilat janë ligjet kur ne jemi tërësisht të përjashtuar nga procesi. Kemi thënë që çdo ligj i nevojshëm për procesin e integrimit, do ketë votën e PD, kemi kërkuar bashkëpunim dhe na është mohuar transparenca minimale për t’i ditur këto projektligje”, tha Bardhi.

Në reagim, kryetari i Kuvendit Niko Peleshi mohoi akuzat, duke theksuar se nuk ekziston asnjë listë e fshehur e projektligjeve.

“Sa i përket listës së projektligjeve, në zyrën e Kuvendit nuk mbahet apo fshihet asnjë listë integrale e projektligjeve që lidhen me procesin e integrimit. Nuk besoj se ekziston ndonjë projektligj që nuk ka qenë i informuar deputeti për rëndësinë e projektligjit dhe lidhjen e tij me procesin e integrimit europian. Nuk mund të thuhet që nuk e kemi ditur që një projektligj nuk i përket detyrimeve të integrimit dhe ndaj nuk e kemi votuar”, u përgjigj Peleshi.

/rtsh.al/