Mazhoranca dhe opozita në Kosovë kanë shkëmbyer akuza të ndërsjella për bllokimin e Kuvendit, pas dështimit të 26-të me radhë për konstituimin e institucioneve.

Deputetja e Partisë Demokratike të Kosovës (PDK), Vlora Çitaku, tha se Kosova ndodhet në një krizë institucionale dhe ekonomike, dhe se është koha që të vihet qytetari në qendër të vendimmarrjes politike.

 “Sot dështuam sërish të konstituojmë institucionet. Vendi është në krizë, ekonomia është në krizë. Është momenti të mendojmë për qytetarin më shumë se për vetveten. Fatkeqësisht, seanca u kurdis për të akomoduar nevojat e deputetëve e jo të qytetarëve,” u shpreh Çitaku.

Në anën tjetër, deputeti i Lëvizjes Vetëvendosje, Dimal Basha, akuzoi opozitën për bllokimin e themelimit të një komisioni parlamentar që do të mundësonte votimin e fshehtë. Ai tha se kjo sjellje është e pajustifikueshme dhe absurde.

“Kuvendi ka pasur bllokadë edhe më parë, por me kauzë. Ne kemi bllokuar për të ndalur ‘Zajednicën’ dhe Gjykatën Speciale. Tani po bllokohet për Albulenën, e cila vetë i ka kundërshtuar këto. Kjo është absurde,” tha Basha.

Nga 111 deputetë të pranishëm në seancë, vetëm 53 votuan pro dhe 1 kundër për të miratuar formimin e komisionit për votimin e fshehtë. Seanca e radhës është caktuar për 5 qershor në orën 11:00

/rtsh.al/