Protesta në kryeqytet kanë shënuar ditën e 83-të radhazi. Protestuesit u mblodhën sërish sot në sheshin “Skënderbej” për të shprehur pakënaqësitë e tyre ndaj politikave sociale dhe ekonomike në vend. Pas grumbullimit fillestar në qendër të Tiranës, pjesëmarrësit marshuan përgjatë bulevardit “Dëshmorët e Kombit”, duke u ndalur përpara godinës së Kryeministrisë, ku organizuan edhe fjalimet kryesore të ditës.

Gjatë fjalimeve të mbajtura përpara selisë së ekzekutivit, protestuesit e pranishëm ngritën një sërë shqetësimesh që prekin drejtpërdrejt jetesën e përditshme dhe funksionimin e shtetit të së drejtës.

Në fokus të diskutimeve ishin rritja e kostove të jetesës për familjet me të ardhura të ulëta; kërkesa për rritje me baza reale të skemës së pensioneve dhe mbështetjes shtetërore; shqetësimi për largimin e rinisë dhe mungesën e perspektivës vendore; thirrje për transparencë, llogaridhënie dhe rritje të sigurisë publike.

Organizatorët bënë me dije se aksioni qytetar do të vijojë edhe në ditët në vijim, deri në plotësimin e kërkesave të tyre.

/rtsh.al/