Kryeministri Edi Rama ka deklaruar se negociatat me Bashkimin Evropian nuk janë bllokuar.

Duke folur nga Asambleja e njësisë numër 2 të Partisë Socialiste në Lushnjë, Rama tha se ajo çka përflitet përgjatë ditëve të fundit në media për bllokimin e negociatave të Shqipërisë me Bashkimin Evropian nuk është e vërtetë.

Sipas tij, Shqipëria ecën sipas kalendarit të Komisionit Evropian.

“Një e vërtetë shumë e thjeshtë u mbush gjithë hapësira e tenxhereve me një vorbull të madhe; u bllokuan negociatat, e humbëm, mbaroi kjo punë, humbëm trenin për në Europë, e dogjëm, një gënjeshtër me shtatë bishta. As nuk është bllokuar as nuk është ndaluar asgjë.

Ndërkohë që e vërteta është që ne po ecim sipas planit. Kemi një plan të dakordësuar me Komisionin Evropian. Është një kalendar që na e ka dhënë Komisioni Evropian përpara”, tha Rama.

Rama shpjegoi se Shqipëria vendet e mëdha të Bashkimit Evropian i ka në krah të saj në procesin e anëtarsësimit të vendit në familjen evropiane.

“Është hera e parë. Është hera e parë që fati ju buzëqesh shqiptarëve dhe Shqipërisë. Pse e them këtë? Sepse është hera e parë që të gjithë të mëdhenjtë që na duhen për të realizuar atë që është një ëndërr historike, ne i kemi me vete, i kemi bërë me vete dhe na duan me vete.

Dhe e filluam nga bishti i fundit i kolonës dhe jemi tani në pararojë të procesit, bashkë me Malin e Zi. Në 11 muaj kemi hapur të gjithë kapitujt. Nuk e ka bërë asnjë vend tjetër.Por ka një gjë që shqiptarët duhet ta mos e harrojnë: dëgjoni këtu, të gjitha vendet e reja që kanë hyrë në Bashkimin Europian kanë pasur luftra të brendshme politike“

Ai vuri në dukje se përveç atyre që i kanë dhënë votën Partisë Socialiste, të tjerët nuk duan t’ia dinë për përgjegjësinë e ushtrimit të detyrave nga ana PS-së, por kërkojnë sipas tij, vetëm zhurmë.

“Përveç atyre që na kanë dhënë votën dhe na kanë dhënë mbështetjen më 11 maj, askush tjetër nuk na e fal dhe nuk do t’ia dijë fare për atë fitore që ne morëm, në kuptimin e respektit dhe as pse na zgjodhën ne shqiptarët në kuptimin e detyrave, por do vetëm sherr, shamatë, baltë, llum, llucë e çfarë të doni ju.

Ndërkohë që e gjithë kjo bie edhe mbi ata që na kanë dhënë votën, sepse të dëgjosh përditë e përnatë vetëm keq dhe zi, sigurisht që diçka ndodh në aspektin e motivimit.

Por ne nuk kemi një mundësi të korrigjojmë të tjerët,  ne kemi mundësi vetëm të korrigjojmë veten dhe të përmirësojmë punën tonë, dhe pjesë e kësaj është edhe rritja e komunikimit me njerëzit drejtpërdrejt.  Për të ndarë me njerëzit ku jemi dhe ku po ecim”, deklaroi më tej Rama.

/rtsh.al/