Lideri i “Reform UK”, Nigel Farage, ka dhënë dorëheqjen e menjëhershme si deputet duke çuar në zgjedhje të parakohshme zonën e Clacton-it. Ky vendim i papritur vjen në një kohë kur politikani britanik po përballet me dy hetime të rëndësishme parlamentare.

Komisionet po verifikojnë dyshimet se ai nuk ka deklaruar përfitime në natyrë dhe një donacion prej pesë milionë paundësh. Vetë Farage i ka mohuar prerazi të gjitha këto akuza duke thënë se ka zbatuar me saktësi çdo rregull ligjor.

Përmes një deklarate publike ai u shpreh se ka menduar gjatë dhe ka vendosur që njerëzit e Clacton-it duhet të jenë ata që do të gjykojnë veprimet e tij. Më tej ish-deputeti shtoi se po kandidon sërish në këto zgjedhje të pjesshme si një mundësi për t’i dërguar një mesazh të fortë establishmentit.

Ky hap politik shihet nga analistët si një lëvizje taktike për të sfiduar hetimet përmes votës popullore. Gara e re elektorale pritet të zhvillohet brenda pak javësh dhe do të jetë mjaft e nxehtë për shkak të debateve. Ndërkohë mediat britanike kanë kthyer sytë nga kjo zonë pasi rezultati do të përcaktojë të ardhmen e liderit të djathtë.

Gazetar: A. Mata

/rtsh.al/