FBI ka kryer një kontroll të autorizuar nga gjykata në banesën e ish-këshilltarit të sigurisë kombëtare të Shteteve të Bashkuara, John Bolton, si pjesë e një hetimi që lidhet me çështje të sigurisë kombëtare.

Ngjarja ndodhi në zonën e Uashingtonit, ku sipas informacioneve të siguruara nga një burim i CNN, katër deri në gjashtë agjentë të FBI kanë komunikuar fillimisht me një person në verandën e shtëpisë së Bolton dhe më pas kanë hyrë në rezidencë.

Vetë Bolton, në një reagim për CNN, tha se nuk ishte në dijeni të kontrollit nga FBI dhe se po e hetonte vetë këtë zhvillim.

Lajmi për ndërhyrjen e FBI-së u raportua për herë të parë nga New York Post. Ndërkohë, drejtori i FBI-së, Kash Patel, në një postim në rrjetet sociale shkroi: “ASKUSH nuk është mbi ligjin… Agjentë të FBI-së në mision”, por nuk specifikoi nëse i referohej drejtpërdrejt këtij rasti.

Bolton ka qenë këshilltari i sigurisë kombëtare me shërbimin më të gjatë nën Trump, duke dhënë dorëheqjen në vitin 2018.

/rtsh.al/