Shtetet e Bashkuara dhe Mbretëria e Bashkuar duket se do të zgjidhen nga FIFA si mikpritëse të Kupës së Botës për Femra 2031 dhe 2035, kur kompeticioni rritet nga 32 në 48 ekipe.

Infantino u tha zyrtarëve evropianë të futbollit se kishte marrë vetëm një shprehje interesi për të pritur edicionin e Kupës së Botës për Femra në vitin 2031, dhe ajo ishte nga Shtetet e Bashkuara me mundësinë e vendeve të tjera në rajonin e Concacaf që t’i bashkoheshin projektit. Kjo ka të ngjarë të përfshijë Meksikën.

Mbretëria e Bashkuar, megjithatë, duket e destinuar të zgjidhet nga FIFA si mikpritëse e Kupës 2035.

Infantino tha se FIFA ka vetëm një “ofertë të vlefshme”, dhe ajo është nga shoqatat e bashkuara britanike me qendër në Angli. Spanja javën e kaluar ende shpresonte të paraqiste një ofertë, ndoshta me Portugalinë dhe Marokun, në një përsëritje të planit të bashkëorganizimit për Kupën e Botës për meshkuj 2030. Por komentet e Infantinos në mbledhjen vjetore të UEFA-s duket se përjashtojnë një ofertë reale spanjolle.

“Pra, rruga është e hapur për Kupën e Botës për femra që do të mbahet në 2031 dhe 2035 në disa vende të mëdha, – tha presidenti i FIFA-s, për t’i dhënë edhe më shumë shtysë lëvizjes së futbollit të femrave. FIFA pritet të konfirmojë vendet pritëse për Kupën e Botës për femra vitin e ardhshëm. Edicioni i 2027-ës me 32 skuadra do të organizohet nga Brazili.