Këtë të premte në Shqipëri starton gara ndërkombëtare e çiklizmit, Giro d’Italia. Ishte Policia e Tiranës ajo që bëri të ditur detajet e planit të masave për tri ditë me radhë.

Sipas planëzimit, në etapën e parë të garës në qytetin e Tiranës më 9 maj 2025, do të ketë ndryshime në qarkullimin dhe parkimin e automjeteve, nga ora 13:00 deri në orën 18:00 në 16 rrugë kryesore, përfshi edhe bulevardet, ndërsa në 7 blloqe banimi do të ketë akses të kufizuar po në të njëjtën fashë kohore.

Në datën 10, të shtunën, do të ketë ndalim parkimi nga ora 08:00 deri në 11:00 në segmentet që prekin vendet e akomodimit të ekipeve.

Ndalimqarkullimi dhe parkimi do të nisë në orën 10:00 deri në 18:00 në 18 rrugë, sheshe apo bulevarde, ndërsa akses të kufizuar qarkullimi në blloqe banimi do të ketë në 7 zona të ndryshme.

Gjatë këtyre ditëve, devijim trafiku do të kenë të gjitha automjetet e transportit publik të shumë linjave.

Në terren do të shpërndahen më shumë se 3.500 efektivë të Policisë Rrugore dhe Policive Bashkiake në Tiranë, Durrës, Elbasan dhe Vlorë.

Gazetare: Flutura Tota

/rtsh.al/