Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka zbardhur sot vendimin përfundimtar për një nga dosjet më të bujshme të abuzimeve me fondet publike. Tetë të pandehur, mes të cilëve ish-zyrtarë dhe biznesmenë, janë dënuar me burgim, shërbim prove dhe punë në komunitet, pas një procesi të zhvilluar me procedurën e gjykimit të shkurtuar.

Trupi gjykues, i përbërë nga gjyqtarët Bib Ndreca, Flora Hajredinaj dhe Elsa Ulliri, rrëzoi akuzën e “Grupit të strukturuar kriminal”, por vërtetoi akuzat për vjedhje duke shpërdoruar detyrën dhe falsifikim dokumentesh. Krahas dënimeve me burg, gjykata ka vendosur një masë drastike financiare: konfiskimin e aksioneve të kompanive të përfshira në koncesion.

Dënimet kryesore, Rjepaj dhe Rrapaj

Protagonistët kryesorë të kësaj dosjeje, Klodian Rjepaj dhe biznesmeni Ilir Rrapaj, i kanë shpëtuar akuzës së rëndë të “Grupit të strukturuar kriminal” për mungesë provash. Megjithatë, ata janë shpallur fajtorë për vepra të tjera penale.

Klodian Rjepaj

U shpall fajtor për “Vjedhje duke shpërdoruar detyrën” dhe “Falsifikim dokumentesh”. Ai u dënua fillimisht me 6 vite burg në bashkim të dënimeve, por për shkak të gjykimit të shkurtuar, do të vuajë përfundimisht 4 vite burgim.

Ilir Rrapaj

Gjykata ndryshoi kualifikimin ligjor të veprës, duke e shpallur fajtor për “Vjedhje duke shpërdoruar detyrën”. Ai gjithashtu u dënua me 4 vite burgim (pas uljes prej 1/3 nga dënimi fillestar prej 6 vitesh).

Për të dy të dënuarit, vuajtja e dënimit llogaritet nga dita e arrestimit dhe do të kryhet në një burg të sigurisë së zakonshme.

Goditja financiare, konfiskimi i aseteve

Në një lëvizje të rëndësishme për rikuperimin e dëmit të shkaktuar, GJKKO vendosi konfiskimin e aseteve të lidhura me biznesmenin Ilir Rrapaj. Konkretisht konfiskohet 40% e pjesës takuese të shoqërisë koncesionare “Sani Service sh.p.k.”, e cila i korrespondon subjektit tregtar “Investitial LLC” (regjistruar në Kosovë), me administrator të vetëm Ilir Rrapajn.

Konfiskohet plotësisht shoqëria tregtare “Globalsher” sh.p.k. dhe të gjitha asetet e saj, ku Rrapaj ishte ortak i vetëm.

Fati i zyrtarëve të tjerë, nga burgu te shërbimi i provës

Për gjashtë të pandehurit e tjerë, të akuzuar kryesisht për shpërdorim detyre dhe falsifikim dokumentesh, gjykata dha dënime të diferencuara, duke marrë parasysh edhe kohën e kaluar në paraburgim.

Marsela Serjani dhe Saimir Kadiu u dënuan përfundimisht me nga 2 vite e 4 muaj burgim. Megjithatë, gjykata urdhëroi heqjen e masës “Arrest në shtëpi” për ta, pasi koha e qëndrimit në këtë masë sigurie e ka tejkaluar masën e dënimit të dhënë.

Petref Mersini dhe Arben Gjata u dënuan me nga 2 vite e 4 muaj burgim, por ekzekutimi i këtij dënimi u pezullua. Ata do të kalojnë në shërbim prove për 24 muaj, me kushtin që të mos kryejnë vepra të tjera penale dhe të mbajnë kontakte me Zyrën e Shërbimit të Provës.

Naile Ajazi u dënua përfundimisht me 1 vit burgim, por edhe për të dënimi u pezullua, duke u kaluar në shërbim prove për 24 muaj.

Genc Burazeri u dënua me 1 vit burgim, por dënimi u konvertua në 80 orë punë në interes publik, e cila duhet të kryhet brenda 6 muajve pa cënuar angazhimet e tij profesionale.

Gjykata bëri me dije se provat materiale (CD dhe DVD) mbeten pjesë e fashikullit për një proces tjetër të ndarë që po vijon gjykimin. Shpenzimet gjyqësore u janë ngarkuar solidarisht të pandehurve, ndërkohë që palët kanë 15 ditë kohë për të apeluar vendimin në Gjykatën e Posaçme të Apelit, nga momenti i komunikimit të vendimit të arsyetuar.

/rtsh.al/