Kryeministri i Serbisë Millosh Vuçeviq ka deklaruar se hapja e urës mbi Ibër në Mitrovicë të Kosovës do të ishte një veprim i rrezikshëm që do të kërcënonte mbijetesën e serbëve në Kosovë.

I pyetur nëse pret që Bashkimi Evropian të ndërmarrë ndonjë hap konkret, duke pasur parasysh deklaratën e Miroslav Lajçak se vendosja e vendimit për hapjen e urës ishte kundër vullnetit të qytetarëve dhe se nuk kontribuon në normalizimin e marrëdhënieve dhe se do të diskutohet në takimin e radhës në Bruksel, Vuçeviq u përgjigj se: “Do ta ndjekim”.

“Më e rëndësishme është që KFOR-i para së gjithash nuk e lejon hapjen e urës ndërmjet Mitrovicës veriore dhe jugore, sepse unë më së shumti mbështetem në këtë çështje. Hapja e urës do të jetë cunami për mbijetesën e Serbët në Mitrovicë prandaj po e bën Albin Kurti”, tha Vuçeviq.

Kryeministri tha se hapja e urës do të ishte një “katastrofë” dhe se ajo anulon drejtpërdrejt të gjitha bisedimet, të gjitha marrëveshjet, e bën procesin e dialogut të pakuptimtë.

“U bëj thirrje edhe një herë, mbi të gjitha vendeve të Kuintit, që të mos e lejojnë këtë, që askush të mos luajë me të, dhe që KFOR-i të bëjë atë që është misioni i tij. Kam përshtypjen në bazë të asaj që tha komandanti i KFOR-it. Nuk mund t’ju them nëse do të ndryshojë diçka në ditët në vijim, shpresoj që, sipas meje, të mos ketë një lëvizje të tillë, e cila nuk sjell paqe dhe marrëdhënie më të mira ndërmjet serbëve dhe shqiptarëve, por vetëm rrezikon mbijetesën e tyre”, theksoi Vuçeviq.

/rtsh.al/