Hungaria njoftoi Bashkimin Evropian se po heq veton ndaj fondit të Mekanizmit Evropian të Paqes për Ukrainën, ndërsa marrëdhëniet mes palëve përmirësohen pasi kryeministri i ri Peter Magyar mori drejtimin e vendit pas rënies nga pushteti të liderit nacionalist Viktor Orban.

“Tani kemi një ministër të ri hungarez, që do të thotë gjithashtu se po ecim përpara me zhbllokimin e 6.6 miliardë eurove”- tha kryediplomatja e BE-së, Kaja Kallas përpara një takimi të ministrave të mbrojtjes së bllokut. Paratë në fondin e Mekanizmit Evropian të Paqes fillimisht ishin menduar për të rimbursuar pjesërisht vendet e BE-së për armët me të cilat kanë furnizuar tashmë Ukrainën, por Kallas bëri me dije se donte që një pjesë e tyre të mund të përdoren për të blerë armë të reja për Kievin, me qëllim forcimin e luftës së atij vendi kundër pushtimit rus.

Heqja e vetos ndaj fondit është ndër lëvizjet e fundit që Hungaria ka bërë në mbështetje të Ukrainës për të përmirësuar marrëdhëniet me Brukselin. Ndërkohë, BE-ja ka siguruar Budapestin se do të zhbllokojë më shumë se 16 miliardë euro, të cilat ishin ngrirë gjatë qeverisjes së Viktor Orban.

/rtsh.al/