Zyrtarët e Inteligjencës së Mbrojtjes së Ukrainës (HUR) kanë identifikuar mbi 28 mijë shtetas të huaj që shërbejnë me kontratë në Forcat e Armatosura të Rusisë.

Ky numër vazhdon të rritet, sipas të dhënave të paraqitura sot, më 29 prill.Të dhënat u publikuan nga Dmytro Usov, përfaqësues i HUR-së dhe sekretar i Shtabit Koordinues të Ukrainës për Trajtimin e Robërve të Luftës, gjatë një konference për përdorimin e luftëtarëve të huaj nga Rusia në luftën kundër Ukrainës.

Sipas Usov, autoritetet ukrainase kanë të dhëna të verifikuara personale (emra dhe shtetësi) për këta individë. HUR vlerëson se shtetas nga të paktën 136 vende po luftojnë brenda forcave ruse. Ky numër nuk përfshin trupat nga Koreja e Veriut, të cilët vlerësohen në rreth 14.100 ushtarë.

Usov theksoi se Rusia shpesh i pengon rekrutët e huaj të largohen nga shërbimi ushtarak edhe pasi kontratat e tyre skadojnë.

Sipas inteligjencës ukrainase, të paktën 3.080 individë mbeten në radhët e ushtrisë ruse pavarësisht se kontratat e tyre kanë përfunduar zyrtarisht.

“Duhet të tërheq vëmendjen te shifra 3.080 – këta janë shtetas të vendeve të huaja që kanë nënshkruar kontrata, kontratat e tyre kanë mbaruar, por nuk kanë dalë nga radhët e Forcave të Armatosura të Rusisë. Rusia do të vazhdojë t’i përdorë ata,” tha Usov.

Inteligjenca ukrainase ka regjistruar një rritje të numrit të luftëtarëve të huaj të kapur në fushën e betejës. Aktualisht, në robëri ndodhen qindra individë nga 48 vende të ndryshme.

Luftëtarët e huaj përdoren si në njësitë luftarake, ashtu edhe në sektorin e industrisë së mbrojtjes së Rusisë, para se të dërgohen në front. Mes tyre ka shtetas nga vendet e Organizatës së Traktatit të Sigurisë Kolektive (CSTO), si dhe nga Afrika, Azia dhe Europa.

Planet e Rusisë për 2026Paralelisht, Moska po planifikon të rekrutojë afër 20.000 shtetas të huaj në forcat e saj të armatosura gjatë vitit 2026. Pjesë e këtij plani janë masa shtrënguese ndaj popullsisë emigrante.

Sipas HUR-së, Shtabi i Përgjithshëm i Rusisë bashkë me Ministrinë e Punëve të Brendshme kanë kryer inspektime të burrave të huaj të moshës 18–60 vjeç në të gjitha distriktet federale.

/rtsh.al/