Shefja për Politikë të Jashtme e Bashkimit Evropian, Kaja Kallas, ka deklaruar se dialogu mes Kosovës dhe Serbisë ka ngecur dhe se BE-ja po shqyrton mundësinë e përdorimit të mjeteve të tjera për të arritur normalizimin e marrëdhënieve mes dy vendeve. Në një intervistë për Radion Evropa e Lirë, Kallas tha se është e gatshme të shqyrtojë mundësitë e reja për të shtyrë përpara procesin e normalizimit, duke theksuar se këtë do ta bëjë së bashku me Përfaqësuesin e Posaçëm për dialogun, Peter Sorensen, në ditët në vijim.

“Lidhur me dialogun Kosovë-Serbi, ose dialogun Beograd-Prishtinë, unë kam emëruar një Përfaqësues të Posaçëm, me të cilin do të ulem për të parë të ardhmen. Ajo që na intereson është normalizimi i marrëdhënieve mes Kosovës dhe Serbisë. Qoftë përmes këtij dialogu, apo ndonjë instrumenti tjetër, ne do të mbledhim ide dhe do të dalim me një propozim”, u shpreh ajo.

Kallas theksoi se është e rëndësishme të ruhet fokusi në objektivin kryesor: normalizimin e marrëdhënieve mes Kosovës dhe Serbisë.

“Duket se dialogu ka ngecur pak, sepse palët vetëm po ankohen për njëra-tjetrën. Mendoj se duhet ta mbajmë qëllimin përfundimtar në mendje, normalizimin e marrëdhënieve mes tyre, në mënyrë që të mund të ecin përpara në rrugën evropiane. Ndoshta është dialogu, ndoshta është një tjetër mjet. Jam e gatshme ta shqyrtoj këtë çështje, dhe do ta bëj këtë së bashku me Përfaqësuesin e Posaçëm në ditët në vijim”, shtoi Kallas.

Sa i përket protestave që po zhvillohen në Serbi, Kallas i konsideroi ato si një shenjë të funksionimit të demokracisë, duke theksuar se protestat ndodhin edhe në vendet anëtare të Bashkimit Evropian.

“Sa i përket protestave, kjo është demokracia, ndodh edhe në vendet anëtare të BE-së që njerëzit të lodhen nga qeveritë dhe të protestojnë. Kjo tregon se demokracia po funksionon”, tha Kallas.

Kallas ka njoftuar gjithashtu se do të vizitojë Ballkanin Perëndimor javën e ardhshme për të diskutuar më tej me liderët e rajonit rreth mundësive për avancimin e procesit të normalizimit të marrëdhënieve mes Kosovës dhe Serbisë.

/rtsh.al/