Vendimi i Presidentit Donald Trump për të ndaluar bombardimet amerikane kundër objektivave iranianë në Ngushticën e Hormuzit erdhi pas rekomandimeve të prera nga udhëheqësit më të lartë ushtarakë të SHBA-së. Sipas burimeve konfidenciale të cituara nga gazetari Barak Ravid, komandanti i Komandës Qendrore të SHBA-së (CENTCOM), Admirali Brad Cooper, i ka përcjellë Shtëpisë së Bardhë vlerësimin se fushata e bombardimeve ka arritur kufirin e efektivitetit të saj ushtarak.

Kjo këshillë solli urdhrin e parë të Trumpit në dy javë për uljen e intensitetit të luftimeve, duke shënuar një pranim të kufizimeve që mbart fuqia ajrore në këtë rajon strategjik.

Më herët gjatë javës, Admirali Cooper paraqiti analizën e tij operative për Pentagonin, Shefat e Shtabit të Bashkuar dhe Shtëpinë e Bardhë. Sipas vlerësimit ushtarak dy javët e sulmeve intensive kishin dëmtuar ndjeshëm aftësinë e Iranit për të goditur anijet tregtare në Ngushticën e Hormuzit dhe se pjesa më e madhe e objektivave të përcaktuara për t’u goditur nga ajri tashmë ishin asgjësuar.

Cooper sqaroi se i vetmi hap i mëtejshëm do të ishte rikthimi te operacionet masive luftarake për të goditur 20% të mbetur të objektivave të përcaktuara fillimisht në Operacionin Epic Fury. Në mungesë të një vendimi për të ndërmarrë një hap të tillë radikal, vazhdimi i bombardimeve nuk kishte më kuptim ushtarak.

Gjithashtu, Kryetari i Shtabit të Përbashkët të Ushtrisë, Gjenerali Dan Caine, i drejtoi një paralajmërim privat Sekretarit të Mbrojtjes Pete Hegseth dhe Presidentit Trump. Caine theksoi se konsumi i lartë i raketave interceptore të mbrojtjes ajrore mund të cenonte seriozisht aftësinë e SHBA-së për të mbrojtur trupat dhe aleatët në rajon.

Diplomacia e bisedimeve dhe statusi “qetësi për qetësi”

Pavarësisht se deri të enjten mbrëma Trump anonte nga rifillimi i sulmeve të përmasave të mëdha, këshillat ushtarake e konsoliduan qëndrimin e tij të premten për të urdhëruar frenimin. Aktualisht, situata në terren përshkruhet si një armëpushim de facto “qetësi për qetësi”, ku të dyja palët kanë pezulluar goditjet.

Në rrafshin diplomatik, Ambasadori i SHBA-së në OKB, Mike Waltz, konfirmoi për emisionin Meet the Press se SHBA-ja po lejon hapësirë për negociata.

“Presidenti po i mban të gjitha opsionet në tryezë, por ai gjithashtu po u jep pak hapësirë bisedimeve. Bisedimet midis SHBA-së dhe Iranit po vazhdojnë në çdo nivel,” deklaroi Mike Waltz.

Ndërsa Irani dhe Omani po vazhdojnë bisedimet për një marrëveshje rreth tranzitit të sigurt detar, mbetet ende e paqartë nëse kushtet e tyre do të jenë të pranueshme për Shtëpinë e Bardhë, e cila po diskuton paralelisht me Britaninë e Madhe për organizimin e një konference ndërkombëtare mbi sigurinë detare.

/rtsh.al/