Komisioni parlamentar për të Drejtat e Njeriut dhe Mjetet e Informimit Publik i ka dhënë sot dritën jeshile ndryshimeve ligjore që prekin diasporën shqiptare. Nën drejtimin e kryetares Jorida Tabaku, komisioni miratoi në tërësi projektligjin e ri.

Fokusi i mbledhjes së sotme ishte shqyrtimi i Projektligjit “Për disa ndryshime dhe shtesa në ligjin nr. 16/2018 ‘Për diasporën’, të ndryshuar”.

Nisma ligjore u prezantua para deputetëve nga Zëvendësministrja për Evropën dhe Punët e Jashtme, Vilma Premti, e cila shpjegoi nevojën e këtyre ndërhyrjeve në ligjin ekzistues. Ndërkohë, në rolin e relatorit për këtë projektligj ishte deputeti Ardit Bido.

Pas prezantimit të nismës, mbledhja vijoi me sesionin e pyetjeve dhe diskutimeve nga anëtarët e komisionit lidhur me efektet e këtyre ndryshimeve.

Në përfundim të procesit shqyrtues, Komisioni për të Drejtat e Njeriut dhe Mjetet e Informimit Publik e miratoi projektligjin në parim, nen për nen dhe në tërësi, duke i hapur rrugë procedurave të mëtejshme parlamentare për miratimin në seancë plenare.

/rtsh.al/