Është mbyllur me sukses kursi për drejtor sportiv, i organizuar nga Federata Shqiptare e Futbollit, ku u diplomuan 31 kursantë. Ata përfaqësojnë një brez të ri profesionistësh në menaxhimin sportiv të klubeve shqiptare.

Ceremonia e diplomimit u zhvillua në praninë e Drejtorit Teknik të FSHF-së, Abdyl Kuriu, dhe anëtarit të KE të FSHF-së, Gjergji Petro, si dhe me pjesëmarrjen e të ftuarit special, presidentit të Skënderbeut, Ardian Takaj.

Gjatë ceremonisë, Takaj ndau eksperiencën e tij shumëvjeçare në futbollin shqiptar dhe ndërkombëtar, duke theksuar rëndësinë e rolit të drejtorit sportiv në ndërtimin e projekteve të qëndrueshme dhe konkurruese. Ai u ndal edhe te përvoja e tij me Skënderbeun, duke kujtuar periudhën e sukseseve historike të klubit dhe pjesëmarrjet në UEFA Europa League, një arritje e rëndësishme për futbollin shqiptar.

Në këtë kurs u diplomuan edhe emra të njohur të futbollit shqiptar që kontribuojnë aktualisht në klube të ndryshme, mes tyre Vioresin Sinani, Luan Pinari dhe Renato Malota.

Ky program i FSHF-së synon të rrisë profesionalizmin në administrimin sportiv dhe të forcojë kapacitetet drejtuese në klubet shqiptare, duke krijuar standarde më të larta në menaxhimin e futbollit modern.