Presidenti i Venezuelës, Nicolas Maduro, ka shprehur gatishmërinë e tij për të nisur biseda serioze me Presidentin e Shteteve të Bashkuara, Donald Trump, duke theksuar se dialogu mund të përqendrohet në luftën kundër trafikut të drogës dhe në mundësitë për investime amerikane në sektorin e naftës venezueliane.

Presidenti venezuelian Nicolas Maduro tha se ishte “gati” për bisedime mbi trafikun kundër drogës, naftës ose marrëveshjeve ekonomike me qeverinë amerikane, gjatë një interviste televizive.

Maduro deklaroi se Venezuela është një “vend vëlla” për Shtetet e Bashkuara dhe se qeveria e tij mbetet miqësore ndaj popullit amerikan.

“Qeveria amerikane e di këtë, sepse u kemi thënë shumë përfaqësuesve të saj: Nëse duan të diskutojnë seriozisht një marrëveshje për të luftuar trafikun e drogës, ne jemi gati. Nëse duan naftë nga Venezuela, Venezuela është gati për investime amerikane, si ajo e Chevron, kurdo që duan, kudo që duan dhe si të duan”, tha kreu i shtetit për VTV, duke theksuar se mund të merren në konsideratë “marrëveshje gjithëpërfshirëse për zhvillimin ekonomik”.

Në të njëjtën intervistë, Presidenti Maduro shmangu përgjigjen kur u pyet në lidhje me bastisjen e supozuar në një strukturë portuale, për të cilën homologu i tij amerikan Donald Trump foli të hënën dhe që besohet të jetë sulmi i parë në tokën venezueliane.

Ai kujtoi se gjatë bisedës së fundit me Trump në nëntor, presidenti amerikan e kishte pranuar autoritetin e tij duke iu drejtuar si “Z. President”.

Intervista e fundit e Maduros u filmua në natën e Vitit të Ri dhe u transmetua në televizionin shtetëror në mbrëmjen e Ditës së Vitit të Ri.

Në pamjet e transmetuara, ai shihet duke ecur me gazetarin në një zonë të militarizuar të Karakasit, ndërsa më vonë merr timonin e një makine ku ndodhej bashkëshortja e tij, Cilia Flores. Ky gjest u interpretua nga komentatorët si një përpjekje për të treguar besim dhe qetësi, pavarësisht tensioneve me SHBA-në dhe reduktimit të paraqitjeve publike të tij në javët e fundit.

Ky ndryshim në tonin e Maduros vjen pas akuzave të Trumpit, i cili e ka cilësuar atë “të paligjshëm” dhe ka kërcënuar ta largojë nga pushteti, duke e akuzuar për drejtimin e një narko-shteti. Maduro ka mohuar me forcë çdo lidhje me krimin, duke thënë se Shtetet e Bashkuara synojnë ta rrëzojnë për të marrë kontrollin e rezervave të mëdha të naftës dhe mineraleve të rralla të Venezuelës.

Në një aktivitet pak para Krishtlindjeve, Maduro i kishte bërë thirrje Trumpit të përqendrohej tek sfidat e brendshme të SHBA-së. Ndërsa në komentet e fundit, ai u shpreh:

“Popullit të Shteteve të Bashkuara i them atë që kam thënë gjithmonë: Venezuela është një vend vëlla, një qeveri miqësore. Duhet të fillojmë të flasim seriozisht, me faktet në dorë. Nëse duan të flasin për marrëveshje për të luftuar trafikun e drogës, ne jemi gati ta bëjmë këtë. Nëse duan naftën e Venezuelës, Venezuela është e gatshme të pranojë investime amerikane si ato të Chevron, kur, ku dhe si duan t’i bëjnë ato.”

/rtsh.al/