Shtetet e Bashkuara të Amerikës vijojnë të forcojnë mbështetjen për drejtësinë shqiptare, këtë herë duke u fokusuar te siguria fizike e atyre që luftojnë krimin.

Ambasada e SHBA-së në Tiranë njoftoi sot se agjentët elitarë të Shërbimit Sekret Amerikan (US Secret Service) kanë trajnuar efektivë të Gardës së Republikës së Shqipërisë.

Në qendër të këtij bashkëpunimi është rritja e kapaciteteve mbrojtëse për zyrtarët e lartë dhe, në mënyrë specifike, për prokurorët e Prokurorisë së Posaçme (SPAK).

Trajnim elitar në Budapest

Sipas njoftimit zyrtar, tetë anëtarë të Gardës së Republikës udhëtuan drejt Budapestit për të marrë pjesë në një trajnim taktik të nivelit të lartë në Akademinë Ndërkombëtare të Zbatimit të Ligjit.

Instruktorët ishin ekspertë të Shërbimit Sekret të SHBA-së, agjencia e njohur botërisht për mbrojtjen e presidentëve amerikanë dhe zyrtarëve të lartë. Qëllimi ishte transferimi i teknikave më të avancuara të mbrojtjes së afërt (VIP protection) te homologët shqiptarë.

Mesazhi i Ambasadës: Të mbrojmë ata që luftojnë krimin

Diplomacia amerikane e bëri të qartë lidhjen mes këtij trajnimi dhe luftës kundër krimit të organizuar në Shqipëri.

“Shtetet e Bashkuara ndihmojnë në mbrojtjen e atyre që na ndihmojnë të luftojmë krimin e organizuar,” thuhet në deklaratën e Ambasadës.

Përveç trajnimit të specializuar, SHBA konfirmoi se po ofron edhe pajisje taktike për Gardën e Republikës. Ambasada u shpreh krenare për bashkëpunimin me ata që i cilësoi si “individë të guximshëm”, të cilët kanë barrën e rëndë për të mbajtur të sigurt zyrtarët e drejtësisë në vendin tonë.

/rtsh.al/