Mbyllja e nëntë postave në veri të Kosovës ka shkaktuar pakënaqësi jo vetëm në Serbi, por edhe te Shtetet e Bashkuara të Amerikës. Zëdhënësi i Departamentit të Shtetit, Matthew Miller, ka shprehur shqetësimin për vendimet e pakoordinoruara të Qeverisë së Kosovës.

Sipas tij, këto vendime rrezikojnë mundësitë e krijuara për Kosovën me ndihmën e SHBA.

“Jemi të shqetësuar me vendimet e vazhdueshme të pakoordinuara nga lidershipi i Kosovës. Ne besojmë se ato i rrezikojnë mundësitë të cilat e ndihmuam Kosovën që t’i krijojë”, tha Miller.

Ky i fundit këshilloi Kosovën që t’i rikthehet angazhimit konstruktiv me aleatët ndërkombëtar.

 “Do ta inkurajonim qeverinë e Kosovës të kthehet në angazhim të afërt dhe konstruktiv me ShBA-në, BE-në, NATO-n dhe me partnerët tjerë të afërt ndërkombëtarë të Kosovës dhe e kemi bërë atë të qartë, siç po e bëj tani publikisht, ia kemi bërë të qartë qeverisë edhe privatisht”, tha zëdhënësi i DASH.

Miller ndër të tjera përmendi edhe mbështetjen që Kosova ka pasur nga SHBA në procesin e shtetndërtimit.

“Nëse e shikoni rrëfimin që nga pavarësia e Kosovës, ShBA-ja e ka mbështetur fuqishëm integrimin e saj të plotë në komunitetin ndërkombëtar si demokraci sovrane e multietnike. Por, për ta realizuar këtë vizion, që është vizion të cilin edhe ne e ndajmë, ne kemi bashkëpunuar me liderët e vazhdueshëm politikë të Kosovës në masa që forcojnë paqen dhe prosperitetin brenda ndërsa avancojmë Kosovën në këtë rrugë euro-atlantike në të cilën jeni pajtuar”, përfundoi ai.

/rtsh.al/