Konflikti në Lindjen e Mesme ka hyrë në ditën e 732-të, ndërsa sot shënohen dy vjet nga sulmet e 7 tetorit 2023, kur militantët e Hamasit sulmuan Izraelin jugor, duke vrarë rreth 1,200 persona dhe rrëmbyer 251 të tjerë.

Lufta që pasoi ka shkaktuar dhjetëra mijëra viktima palestineze dhe ka lënë Rripin e Gazës në rrënoja.

Me rastin e përvjetorit, krerët e institucioneve kryesore të Bashkimit Evropian kanë ndarë mesazhe në mediat sociale, duke nderuar kujtimin e viktimave dhe duke bërë thirrje për një armëpushim të menjëhershëm dhe lirimin e pengjeve.

“Nuk do ta harrojmë kurrë tmerrin e sulmeve të Hamasit të 7 tetorit dhe dhimbjen që u shkaktuan viktimave të pafajshme, familjeve të tyre dhe të gjithë popullit të Izraelit, dy vjet më parë,” deklaruan Presidenti i Këshillit Evropian, Antonio Costa, dhe Presidentja e Komisionit Evropian, Ursula von der Leyen.

“Ne nderojmë kujtimin e tyre dhe punojmë pa u lodhur për paqen,” shtuan ata në mesazhin e përbashkët të publikuar në platformën X.

We will never forget the horror of the Hamas attacks on 7 October and the pain they caused to innocent victims, their families and the entire people of Israel, two years ago.

We honour their memory by working tirelessly for peace.

The immediate release of all hostages and a…

— Ursula von der Leyen (@vonderleyen) October 7, 2025

Zyrtarët e BE-së theksuan se lirimi i menjëhershëm i të gjithë pengjeve dhe një armëpushim janë tani të mundura, duke e cilësuar këtë si një mundësi që nuk duhet humbur.

Ata u bënë thirrje të gjitha palëve të përfshira të marrin pjesë në mënyrë konstruktive në bisedimet që po zhvillohen në Sharm el-Sheikh të Egjiptit, në kuadër të planit të propozuar nga Presidenti i SHBA-së, Donald Trump.

“Ky moment duhet të shfrytëzohet për të hapur rrugën për paqe të qëndrueshme në rajon, bazuar në zgjidhjen me dy shtete,” përfundon mesazhi i tyre.

Presidentja e Parlamentit Evropian, Roberta Metzola, gjithashtu iu referua planit të Trump për “paqen, stabilitetin dhe rindërtimin në Gaza”, duke e cilësuar si një nismë që mban gjallë idenë e zgjidhjes me dy shtete dhe që mund të sjellë lehtësim nga vuajtjet.

“Ky është një moment vendimtar që mund t’i japë fund ciklit të gjakut, terrorit dhe dhunës,” tha Metzola.

Two years. #7October2023 pic.twitter.com/K4JFyIotsm

— Roberta Metsola (@EP_President) October 7, 2025

/rtsh.al/