Crysencio Summerville, anësori holandez i cili ka shënuar dy gola në Kupën e Botës, mund të kishte luajtur për një ekip tjetër kombëtar deri pak muaj më parë. Lojtari i lindur në Roterdam kërkohej nga Surinami (atdheu i prindërve të tij) për ndeshjet eliminatore ndërkonfederale, të cilat në fund i fitoi Iraku.

Një dëmtim gjatë asaj periudhe e pengoi atë të merrte një vendim të menjëhershëm, por vëmendja e trajnerit holandez, Ronald Koeman pas një sezoni të shkëlqyer me Ëest Ham e bindi atë të zgjidhte Portokallinjtë, me të cilët ai përparoi nëpër radhët e të rinjve pa debutuar kurrë për ekipin kombëtar të të rriturve.

“Është një zgjedhje në të cilën luajnë rol si emocioni ashtu edhe arsyeja”, i tha Summerville revistës Voetbal International në fillim të qershorit. “Gjithmonë kam luajtur për ekipet kombëtare të të rinjve holandezë, por gjithashtu ndihem si bir i Surinamit. Shkoj atje me pushime sa herë që mundem dhe shumica e familjes sime jeton atje”.

“Kur zbres shkallët e aeroplanit, i them vetes se jam përsëri në shtëpi. Në fund të fundit, kam zgjedhur atë që është më e mira për mua dhe karrierën time. Në çdo gjë që bëj, synoj nivelin më të lartë të mundshëm dhe shanset e mia për sukses janë më të mëdha me ekipin kombëtar holandez”.